Eru umstøðurnar í gestalonini á Eirargarði nøktandi fyri barnakonur og onnur, sum húsast har?

Tað vil Hervør Pálsdóttir, løgtingskvinna, hava Eyðdis Hartmann Niclasen, landsstýriskvinnu í heilsu- og orkumálum, at svara í einum skrivligum fyrispurningi.

Hon spyr eisini, hvussu standurin er á bygningunum á Eirargarði, og um nakað arbeiði er í gongd við at finna onnur høli ella loysnir fyri barnakonur úr Suðuroynni.

Í viðmerkingunum vísir Hervør Pálsdóttir til eina samrøðu við forstjóran í Sjúkrahúsverkinum í útvarpinum 5. november.Sambært fyrispurninginum segði forstjórin, at bygningurin á Eirargarði, har gestalonin er, er í so ringum standi, at tað ikki loysir seg at umvæla hann. Hann metti eisini, at bygningurin væntandi bert kann brúkast í nøkur fá ár aftrat.

Barnakonur úr Suðuroynni húsast vanliga í gestalonini í eina til tvær vikur undan føðing. Ganga tær yvir tíð, kann uppihaldið gerast longri.

Hervør Pálsdóttir skrivar, at frá fólki, sum hava hildið til har, hoyrast søgur um, at umstøðurnar als ikki eru nøktandi ella virðiligar.

Við fyrispurninginum vil hon hava landsstýriskvinnuna at greiða frá hesum trupulleikum og upplýsa, um nøkur loysn er á veg.